Psa 145 | WNC | STEP | Anutu, gata natane king kapana. Nata umanda kopsa akngae ayakapit. Siwan asinggan asinggan nata gatane umandae yatangenawit.

Psalms 145

Devitda kau aaknga matakut.

1 Anutu, gata natane king kapana. Nata umanda kopsa akngae ayakapit.
Siwan asinggan asinggan nata gatane umandae yatangenawit.
2 Nata kwep apman gae akganimbakngawit.
Siwan asinggan asinggan nata gatane umandae yatangenawit.
3 Buyambam tapa umana akopsa ge ninda umana kopsa waakngae buyambam siknga yatangenatnim.
Sike waapa enane siknga ge ninda umana kopsa waakngae kuupbam natdetnanga dua. Ninu natdetdetninu dapaknga.
4 Anutu, sike aminu apman yuaingga yakapmak kaknga dongu masan aatninguninde sanga gata pasikuyakge yaniwan ita gatane umanda yatangenatning.
Siwan puya buyambamu tasikuyakge wamu yatake kuning.
5 Sike amindanu gatane kekekngaka akngaenu ayaning. Gata gae king kapa ngangun.
Siwan ninanu gatane puya take aknga akngaekan natapasiwit.
6 Siwan aminbamda puya kekeknga taknga aknga pasikuyakge yatake kuning.
Sike natanu gatane umanda kopsa akngae yakapit.
7 Ita gatane take akngakae yatake kuyuuk
gatu musip kwikwik takngakae natake kap taning.
8 Buyambam tapata ninde butaya natanimuke itakan musip kwikwik natanimunggak.
Sike ita kaanga zaat dua yake ita butaya ninde asinggan natanimunggak.
9 Ita take aknga aminbamde tasike musip kwikwiu
sangabamu pasike pekutde nataak.
10 Buyambam tapa, gata sangabamu pasike pekuyakga gatane umanda ayatangenatning.
Siwawan gikane amindabamda ganimbaknganing.
11 Sike ita umanda kopsa akngae kepna kepna kayuwayaune yaning.
Yake gatane kekekngaka buyambam takngae yatake kuning.
12 Yatake kuwawa amin kuupbamda puya buyambam taknga tasikuyakge natapning.
Siwan gatu gae kingu kekekngaapa yuak ngang kaya kuut natapning. Natake umandae natapan buyambam siknga siwik.
13 Sike ga king kapa yuke aminu kuupbam kakuya asinggan asinggan pasiya.
Gata aminbam asinggan asinggan kayuya.
I takngatu dua teak.
I sanga tasike tekut takngae musia siwik.
14 Sike ita aminu meya pakaingu akgatayamuke
gatu aminu kunduta yaipakepu peyaingu ita gatuna yapangenakgak.
15 Anutu, sanga kayuk yuaingu kai gaekan tapan
tomna ba nataaingu nanamna tapdukngane yamunggayak.
16 Ita nanamu kuupbamde yami
takekan yutningge.
17 Anutu waapa noman takngakan tawake
sangabamu tasinggak katangu ninde musip kwikwik natanimunggak.
18 Sike mamin amindaka musia ie siknga tewa kuwan
unin yatawakaingu ita pakapu iatang wesim yuak.
19 Siwan mamin amindaka ie akgwaubanu ita sanga wa aminde ayamunggak.
Sike kwanamu ie sikaingu ita atnatake gatuna waakwau panggak.
20 Ita amin ie siknga nataaingu ita katak siknga kayuak.
Siwan ngana ita aminu waiaknga tasikaingu apasiwan maining.
21 Sike na Buyambam tapatane umana asinggan yatangenawit.
Siwan ginu sangabamu ita pasikuu,
gikaa itane umana asinggan asinggan initangenatnong.